Xé pronto Gimp version 2.8 e contenporaniamente anca Photoshop CS6 (un caxo?).
GIMP el xé el programa de fotoritoco disponìbiƚe a gratis so intenet: www.gimp.org. Descargar e istaƚar uno de sti programini no costa gninte, ma no costa gninte gnanca doparar el PixelR on line che te vedi so ste pàxine in A-foto.net e che el gà xà i stromenti baxe par pareciar ƚe to imàxine prima de ƚa stanpa, siché vedi ti còsa che te convien (prima ròba comuncue, come che digo senpre, canbiar ƚa lengua in "inglexe" parché ƚa tradusion ƚa xé stùpida, come anca cueƚa de'l Photoshop, piena de stranbòti e feserìe).
Par chi che i gà da bexon de stromenti pì potenti oviamente no ocor paròƚe de prexentasion par Photoshop.
Semo tuti in atexa de sto Photoshop CS6, disponìbiƚe a partir da'l 16 de sto mexe, par via de tute ste funsion niove che el inpromete, prensipalmente par el video, ma anca altre. Defati sì, se pol montar imàxine in movimento inte ƚa timeline indrento Photoshop CS6, salvar proxèti e esportar in tuti i formati HD e FullHD. Però semo curioxi de saver se co sto CS6 podaremo veramente far de manco de i programi video che ghemo doparà fin dèso (no se pol saver cuanto e come che ƚe funsion de ƚa version "Extended beta" -cioè de prova- ƚe vien inplementàe inte ƚa version comercial de Photoshop "non extended", prexenpio).
Tegnimo de òcio ƚa evoƚusion.
GIMP
Photoshop CS6:
|
Windows7/XP
|
Axornamento W7/XP
|
Axornamento Mac OSX
|
|
No vedo gnancora disponìbiƚe né ƚa version "Extended" né cueƚa in inglexe (che spèto mi, doparar cueƚa in talian xé un controsenso in tuti i sensi). Ƚa version euro/inglexe de sòƚito ƚa vien fora a prèso un fià pì baso, ma ghe xé un ma: xé canbià anca ƚa poƚédega so i prèsi de Adobe, par cui se podarà far i axornamenti da ƚa version precedente (e nò da ƚe 3 generasion precedente, come prima), e no savemo se sarà oncora disponìbiƚe ƚa version euro/inglexe. In caxo de sta mancansa, me tocarà cronpar ƚa version in talian e 'pò istaƚar na còpia inglexe de sfròxo.
